Një rregullore e re për funksionimin e Agjencisë së Mbikqyrjes Policore është miratuar pasi u vendos edhe drejtori i ri.
Agjencia do të drejtohet tashmë nga Ardi Veliu, ish-drejtor i Përgjithshëm i Policisë. Në bazë të kësaj rregulloreje, e cila ka marrë edhe dritën jeshile nga qeveria, të gjithë agjentët e AMP, duhet ti nënshtrohen testit të drogës.
Kush nuk pranon të bëjë këtë test, do të përjashtohet nga strukturat e AMP.
Në rregullore përcaktohen qartë edhe rregullat e sjelljes dhe të kujdesit në raport me publikun, ku punonjësve iu kërkohet edhe përmbajtje në përdorimin e rrjeteve sociale për të pasqyruar integritet dhe përgjegjësi.
“Punonjësi i Agjencisë nuk duhet të japë leksione, të marrë pjesë në ndonjë diskutim publik, ose në ndonjë program televiziv apo radiofonik, të prononcohet apo botojë në median e shkruar, të bëjë postime në rrjete sociale, mbi çështje që lidhen me punën e Agjencisë, pa miratimin paraprak të drejtorit të përgjithshëm të Agjencisë. Punonjësit që autorizohen për paraqitjen në median vizive, duhet të jenë me veshje zyrtare”, thuhet në rregullore.
Rregullorja është publikuar më 2 shtator në Fletoren Zyrtare dhe tashmë ka hyrë në fuqi. Kliko KËTU për të lexuar rregulloren e plotë.
j.l./ dita
