Kryeministri Edi Rama ka reaguar në lidhje me intervistën e parë të ish-presidentit të Kosovës, Hashim Thaçi të dhënë nga qelia, duke deklaruar se gjykimi ndaj ti në Hagë po ngre pikëpyetje mbi vetë procesin.
Përmes një postimi në rrjetin social në Facebook, kryeministri Rama shkruan se sa më shumë vazhdon ky gjykim ndaj tij, ngrihen edhe më shumë pikëpyetje mbi “nivelin e respektimit të parimit themelor demokratik të “procesit të drejtë”.
“…dhe me këtë intervistë të Presidentit të Republikës së Kosovës e komandantit të Ushtrisë Çlirimtare të Kosovës, mikut tonë e vëllait tim Hashim Thaçi, i cili ka folur për herë të parë qysh nga dita e kyçjes në burgun e Hagës, ku po zhvillohet një gjykim që sa më shumë vazhdon, aq më shumë ngre pikëpyetje mbi nivelin e respektimit të parimit themelor demokratik të “procesit të drejtë”, ju uroj një ditë të mbarë të gjithëve ju, në Shqipëri e në Kosovë”, shkruan kryeministri Rama.
