Gjurmë droge u gjetën në rezidencën e kryeministrit britanik, Downing Street, por edhe në një shtëpi të ministrave të Jashtëm, pas festave ku merrnin pjesë aleatët politikë të ish-kryeministres Liz Truss, zbulon Guardian.
Gazeta britanike raporton se një pluhur i dyshimtë i bardhë u zbulua në pronën Chevening në Kent në verë, vetëm pak ditë para përfundimit të mandatit të Boris Johnson, kur Truss ishte sekretare e Jashtme dhe po konkurronte për kryeministre.
Truss organizoi një ngjarje në 19-21 gusht (e premte deri të dielën), ndërsa konkurronte për postin e kryeministrit. Një tjetër tubim u mbajt në datat 2-4 shtator. Të dyja ngjarjet u ndoqën nga aleatët politikë të Truss.
Pluhuri u gjet në një tryezë të dhomës së lojës dhe një anëtar i stafit pretendoi se kishte testuar pluhurin e bardhë dhe zbuloi se ishte kokainë.
Dëshmia e stafit thotë se kokaina përdorej gjerësisht nga aleatët politikë të Liz Truss. The Guardian thekson se nuk ka asnjë provë që as Truss ose Johnson po e përdornin ose se ata e dinin se po përdorej.
Burime të ndryshme i thanë gazetës gjetje të ngjashme në 10 Downing Street, pas dy festave të organizuara nga Boris Johnson gjatë bllokimeve të Covid, kur ai ishte kryeministër. Megjithatë, Johnson nuk ishte i pranishëm në asnjë prej tyre.
Mbetjet e pluhurit të bardhë u gjetën një mëngjes pas një feste në prag të funeralit të Princit Philip më 17 Prill 2021. Gazeta britanike vëren se stafi i pastrimit gjeti pluhur të bardhë në banja dhe në një tavolinë. Thuhet se pranë tavolinës u gjetën gjithashtu qese të vogla plastike dhe letra të lyera me gjak dhe të vjella.
Gjurmë pluhuri të bardhë dhe qese të vogla plastike u gjetën gjithashtu në tualetet e Downing Street19 dhjetor 2020, një mëngjes pas festës së Krishtlindjes. Stafi dyshonte se ndoshta ishte drogë.
Sue Grey, e cila raportoi për festën gjatë bllokimeve, nuk përmendi marrjen e drogës. Në Britani, mbajtja e kokainës mund të çojë deri në shtatë vjet burg ose gjobë.
The Guardian ka kërkuar koment nga Truss, zëdhënësi i të cilës e përshkroi raportin si “kategorikisht të pavërtetë”. Departamenti i Shtetit nuk pranoi të komentojë, ndërsa një zëdhënës i Johnson tha se ai ishte “i befasuar nga këto pretendime”.
Një zëdhënës i Downing Street tha se gazeta nuk kishte prova për të mbështetur pretendimet. “Nëse do të kishte pretendime thelbësore, do të prisnim që ato të raportoheshin nga policia”, thonë ata.
a.m/dita
