Udhëheqësi Suprem i Iranit, Ajatollah Ali Khamenei, thuhet se ka një plan për t’u larguar nga vendi nëse forcat e sigurisë nuk arrijnë të shuajnë protestat ose nuk i binden më urdhrave të tij, sipas një raporti të inteligjencës të cituar nga The Times.
Raporti tha se 86-vjeçari Khamenei po planifikon të largohet nga Teherani me një rreth të ngushtë prej deri në 20 personash, përfshirë djalin e tij Mojtaba Khamenei, i cili shihet si një pasardhës i mundshëm. Plani do të aktivizohet nëse zbulohet se ushtria dhe forcat e sigurisë po dezertojnë ose refuzojnë të zbatojnë urdhra. Një ish-zyrtar i inteligjencës izraelite tha se destinacioni më i mundshëm i arratisjes do të ishte Moska, duke vënë në dukje se Khamenei mban marrëdhënie të ngushta me Rusinë dhe shpreh admirim për Vladimir Putinin. Plani, sipas të njëjtave burime, bazohet në precedentin e arratisjes së ish-presidentit sirian Bashar al-Assad.
Publikimi raporton gjithashtu se Khamenei ka asete me vlerë dhjetëra miliarda dollarë përmes organizatave të kontrolluara prej tij, ndërsa disa anëtarë të rrethit të tij të ngushtë kanë të afërm që tashmë jetojnë jashtë vendit. Informacioni del në dritë ndërsa demonstratat masive janë duke u zhvilluar në shumë qytete të Iranit, përfshirë qytetin fetar të Qom, për shkak të krizës ekonomike. Protestuesit denoncojnë shtypjen e dhunshme nga forcat e sigurisë, të cilat janë nën kontrollin e drejtpërdrejtë të udhëheqësit suprem, në një kohë kur mungesa e Khameneit nga skena publike ka ngritur pyetje të forta brenda vendit.
j.l./ dita
