Kryeministri Edi Rama ka pritur pasditen e së enjtes në Kryeministri Komisioneren për Zgjerimin e BE Marta Kos, pasi këtë të premte më 21 nëntor, Tirana do të mirëpresë samitin “Plani i Rritjes, rruga jonë në BE’, ku liderët e Ballkanit Perëndimor do të ndajnë diskutime për planin e rritjes, integrimin ekonomik dhe transformimin e rajonit drejt Tregut të Bashkimit Europian.
Samiti do të zhvillohet në Pallatin e Brigadave dhe është planifikuar të nisë në orën 09:30.
Ndërkohë, takimi mes Ramës dhe Kos ka zgjatur për rreth një orë, pasi nisi rreth orën 16:00 dhe përfundoi rreth orës 17, ndërsa në axhendë ka dhe një darkë të planifikuar me të.
Në të njëjtin orar që zhvillohej takimi Rama-Kos në Kryeministri ka qenë prezente edhe zv.kryeministria Belinda Balluku, pasi Gjykata e Posaçme i caktoi masën pezullim nga detyra dhe ndalimin të daljes jashtë shtetit, tashmë të ekzekutuara.
Balluku me vartësit akuzohen se kanë paracaktuar fituesit në dy tenderë me vlerë 210 mln euro, atë të Tunelit të Llogarasë 190 mln euro dhe loti 4 i Unazës së Madhe 20 mln euro.
Balluku ka vijuar takimet në kryeministri me deputetin Ulsi Manja dhe juristë për një opinion juridik lidhur me rastin, ndërsa pretendon se pezullimi nga detyra është shkelje e Kushtetutës nga ana e GJKKO-së dhe se këtë vendim nuk mund ta marrë kjo gjykatë.
Agjenda
Ora: 09:30 – 12:00
Vendi: Pallati i Brigadave
09:30 – Mirëseardhja/ Doorstep Statements
10:00 – Nisja e punimeve të Samitit Groëth Plan
Fjalët Hapëse
-Kryeministri i Shqipërisë, Edi Rama
-Komisionerja e BE-së për Zgjerimin, Marta KOS
11:30 – Foto Familjare
11:35 – Konferencë për shtyp, Kryeministri i Shqipërisë Edi Rama dhe Komisionerja e BE-së për Zgjerimin, Marta Kos.
