Rikthehet tradita e pushimeve të semestrit për nxënësit e shkollave 9-vjeçare. Duke nisur nga dita e sotme, e deri në datën 9 prill, në shkollat e arsimit të detyruar 9-vjeçar në vend, qofshin këto publike apo private nuk do të zhvillohet mësim. Nxënësit e këtyre shkollave do të qëndrojnë një javë pushim.
Ministria e Arsimit dhe Sportit ka vendosur më herët që për nxënësit e këtij cikli arsimor, do të ketë edhe një periudhë të dytë pushimesh gjatë këtij viti shkollor, që do të zhvillohen gjatë kësaj jave, traditë e cila është rikthyer pas disa vitesh.
“Periudha 3 deri në 9 prill do të jetë java e pushimeve për nxënësit në shkollat 9-vjeçare, një traditë e rikthyer tashmë pas shumë vitesh. Këto ditë pushimi le të shërbejnë për të marrë energji të reja pozitive duke kaluar sa më shumë kohë me familjet dhe të afërmit tuaj . Shfrytëzojeni këtë mundësi për t’u angazhuar në aktivitete të larmishme sociale, sportive, artistike, kulturore, etj. Sigurisht që do të keni mjaftueshëm kohë që të luani në ajër të pastër, të bisedoni me njëri-tjetrin dhe të shijoni natyrën në këto ditë të bukura pranverore. Por kam edhe një këshillë që unë gjithnjë e quaj të domosdoshme për ju gjatë pushimeve. Mos iu ndani librit dhe leximit! Bashkë me prindërit, vëllezërit e motrat, lexoni libra të bukur për moshën tuaj, libra artistikë, poezi, fabula, romane”, konfirmoi ministrja e Arsimit dhe Sportit, Evis Kushi në një postim të bërë në rrjetet sociale një ditë më parë.
p.k\dita
