Pesëmbëdhjetë persona janë arrestuan këtë të martë nga Guardia di Finanza, në Basilicata, Liguria dhe Pulia, si pjesë e një operacioni antidrogë. Sipas mediave italiane, konfirmohet se bëhet fjalë për një klan të përbërë nga italianë dhe shqiptarë të akuzuar për trafik ndërkombëtar droge të llojit heroinë, kokainë, hashash dhe marihuanë.
Lënda narkotike sigurohej nga Shqipëria, dërgohej në Itali, ku shpërndahej në të gjithë territorin, e më pas të ardhurat e paligjshme investoheshin po në Shqipëri për blerje të pasurive të paluajtshme dhe aktiviteteve tregtare.
Falë operacionit, u bë i mundur çmontimi i klanit të trafikut të lëndëve narkotike italo-shqiptare, ndërsa u sekuestruan mbi 20 kilogramë heroinë, 5.7 kilogramë marihuanë dhe 105 gram kokainë. Po ashtu, nga arrestimi i kreut të bandës dhe bashkëpunëtorit të tij, të dy shqiptarë, u sekuestruan asete me vlerë 4.2 mln euro.
“Krahas arrestimit të 15 të dyshuarve, kryesisht shqiptarë, mes të cilëve edhe “kreu” i organizatës dhe bashkëpunëtori i tij më i afërt, pronar i fermës bazë, u kryen sekuestrime parandaluese të aseteve, të drejtpërdrejta dhe të barasvlershme me një vlerë prej 4.2 milionë euro”, bëjnë me dije mediat italiane.
Baza e organizatës ishte në Scanzano Jonico (Matera), në një fermë që shërbente si “ekran” për trafikun e drogës.
Lidhja me Shqipërinë u bë përmes “një sistemi kompleks bisedash të koduara”. Filialet përdorën një platformë mesazhesh të konsideruar “të sigurt dhe të blinduar”.
p.k\dita
