Gjykata e Posaçme la dje në masën “arrest me burg” shoferin Jetmir Koloshi, që u kap në Portin e Durrësit katër ditë më parë, teksa imbarkonte në traget furgonin me targa angleze, brenda të cilit kishte edhe 8 pistoleta. I dyshuari edhe gjatë seancës mohoi autorësinë, duke pretenduar se nuk kishte asnjë dijeni për armët dhe se vetëm dërgonte dhe merrte porosi të ndryshme që nisnin emigrantët shqiptarë apo familjet e tyre. Kaloshi tha se ai nuk dispononte vizë për të shkuar në Angli dhe se destinacion ishte Italia. Një person që nuk e njihte i kishte dhënë një pako që ta transportonte, por pa pasur dijeni për ngarkesën e dyshimtë. 35-vjeçari ka shtuar se ai nuk mund të dinte asgjë për armët, që ishin fshehur mirë brenda tavolinës së drurit, nën shtresën e dërrasës, ku ishte hapur një dhomë e fshehtë. Ishte qeni i policisë që nuhati arsenalin dhe më tej skanimi në port. “Unë do i dorëzoja në Itali dhe pastaj do të kthehesha. Nuk kam vizë për në Britaninë e Madhe”, ka thënë Kaloshi. Koloshi ka pretenduar se ishte i punësuar si shofer te agjencia e transportit ‘Sihana’, ndërsa pagesën e merrte në të zezë.
Jetmir Koloshi po hetohet nga SPAK. Në vijim të hetimeve, autoritetet po verifikojnë personin që ka dorëzuar tavolinën ku ishin të fshehura armët. Pjesë e hetimeve pritet të jetë edhe personi pritës në Britani të Madhe, në adresën që do të dorëzohej porosia. Mësohet se autoritetet shqiptare akoma nuk kanë dërguar letër-porosi në Britani të Madhe, por procedurat kanë nisur. Megjithatë, nga ana e tyre autoritetet britanike kanë marrë masa për kontrolle të shtuara në kufi. Dyshimet e policisë shqiptare janë për një rrjet personash me të shkruar kriminale, që e kanë biznes trafikimin e armëve, apo porosi e një karteli të fuqishëm që vepron në ishull. Deklarimet e Koloshit nuk kanë ndihmuar shumë hetuesit mbi ngjarje. Pjesa më e madhe e armëve ishin të markës “Glock”.
Prokuroria e Posaçme ka urdhëruar edhe një kontroll në zyrat e kompanisë që bën dërgimin e mallrave drejt Anglisë. Policia dhe një grup i posaçëm hetimor është zhvendosur në rrugën “Selaudin Zora”, në afërsi të Alliasit, në Tiranë, për të kryer kontrollet e nevojshme dhe për të siguruar pamjet filmike të personave që kanë sjellë pakot, të cilat më pas janë ngarkuar në automjetin furgon, një “Mercedes Benz” që drejtohej nga i riu nga Kukësi, Jetmir Koloshi. Nga verifikimet rezulton se prej muajit shkurt 2021, kompania në fjalë është regjistruar si biznes dhe zonën e Lutonit në Londër, ku pronar i së cilës është Guxim Sefolli. Ky i fundit aktualisht ndodhet në Angli, ndërsa emri i tij në maj 2021, u lakua nga Policia pasi në Portin e Durrësit u bllokua një shumë prej 124 mijë paund, që po transportohej në drejtim të Shqipërisë. Në atë periudhë e gjithë sasia e paundëve ka qenë e futur në disa pako dhe çanta të vogla. I vetmi i arrestuar për akuzën e “trafikut të armëve të zjarrit”, është drejtuesi i furgonit, shtetasi Jetmir Koloshi, 35 vjeç.
