Të paktën 85 njerëz u vranë në kryeqytetin e Jemenit, Sana’a, pas një rrëmuje e cila nisi në momentin kur po shpërndahej ndihma financiare në Qytetin e Vjetër.
Qindra njerëz u mblodhën për të marrë donacione para një shkolle, thanë dëshmitarët dhe mediat, duke theksuar se 300 persona u plagosën.
Rrëmuja ndodhi ndërsa tregtarët po shpërndanin ndihma në para për popullatën në ditët e fundit të Ramazanit, tha Ministria e Brendshme e drejtuar nga Houthi.
Sipas dëshmitarëve okularë, njerëzit prisnin donacione në shumën prej 5000 rialësh jemenas (rreth nëntë dollarë). Njerëzit u grumbulluan, disa prej tyre duke bërtitur për ndihmë ndërsa siguria përpiqej të kontrollonte grumbullimin. Dy tregtarë që organizuan shpërndarjen e ndihmave u arrestuan dhe nisi një hetim.
Dëshmitarët thanë se persona të armatosur qëlluan në ajër në një përpjekje për të kontrolluar turmën.
Kjo shkaktoi panik dhe njerëzit filluan të iknin.
AP shton po ashtu se rebelët e Houthi mbyllën zonën ku po shpërndaheshin parat dhe bllokuan gazetarët të futeshin.
Në Jemen ka tetë vjet që po vazhdon një luftë civile, në të cilën dhjetëra mijëra njerëz kanë humbur jetën, ekonomia është shkatërruar dhe miliona janë të uritur, sipas agjencisë britanike.
j.l./ dita
