Vijojnë edhe sot kërkimet në ujërat ndërkombëtare, 47 milje detare në jugperëndim të Pylos, për të gjetur personat e zhdukur, pas fundosjes së anijes së peshkimit që transportonte refugjatë dhe emigrantë të parregullt nga Tobruku i Libisë me destinacion Italinë.
Mediat greke raportojnë se numri i viktimave deri tani ka shkuar në 78.
Në Qendrën e Pritjes dhe Identifikimit të Malakasës janë marrë 71 persona të shpëtuar nga rrënojat, ndërsa 21 persona së bashku me një tjetër që dyshohet se është trafikant dhe po ruhet po trajtohen në spitalin e Kalamatës.
Ndërkohë 8 persona të arrestuar, si trafikantë emigrantësh ndodhen në policinë e Kalamatës dhe ditën e hënë pritet të dalin para gjykatës për t’u njohur me masat e sigurisë. Ata akuzohen për krijimin e organizatës kriminale për trafikun e paligjshëm të emigrantëve të parregullt, duke shkaktuar mbytjen e anijes nga pakujdesia dhe rrezikimin e jetës.
Ngjarja ndodhi pak ditë më parë. Përmbysja e anijes ka shkaktuar vdekjen e 78 personave, trupat e të cilëve u gjetën, ndërsa 104 u shpëtuan, ndërkaq thuhet se në bord ndodheshin rreth 750 persona.
Në operacionin e kërkimit po marrin pjesë një fregatë e Marinës, tre anije bregdetare dhe një helikopter i rojes bregdetare.
j.l./ dita