Tre persona janë arrestuar nga Policia e Vlorës pasi mbanin peng prej 2 javësh një person nga Kosova duke e kërcënuar për t’i marrë 70 mijë euro.
Vilson Agaj, Orest Çorapaj dhe Julian Zogaj janë 3 personat e arrestuar nga fshatrat e Lumit të Vlorës.
Burime për gazetarin e Report Tv Armand Xhelili kanë bërë me dije se ka qenë e motra e personit të marrë peng, e cila ka denoncuar në polici nga Suedia marrjen peng të vëllait të saj.
Personi nga Kosova është identifikuar si Fisnik Xhaka ndërsa është dhunuar nga 3 të arrestuarit. Xhaka kishte dalë garant tek 3 pengmarrësit që disa persona ne Europë te merrnin një sasi droge me vlerë 70 mijë euro pa e paguar dhe se lekët do i paguanin më vonë.
Pagesa nuk është bërë dhe 3 personat e arrestuar kanë marrë peng Fisnik Xhakën duke i kërkuar 70 mijë eurot për të cilat ai kishte dalë garant.
Xhaka nuk ka pranuar që të bashkëpunojë me policinë. Fisnik Xhaka është dërguar për ndihmë mjekësore në spital dhe më pas është larguar. Në spital ai është paraqitur me shembje në trup dhe plagë e gërvishtje në pjesën e këmbëve.
