Donald Trump ka njoftuar përmes platformës “Truth Social” vendimin e tij për të anuluar valën e dytë të sulmeve ndaj Venezuelës, e cila, sipas tij, ishte planifikuar të zhvillohej.
Duke shpjeguar arsyet e këtij vendimi, presidenti i SHBA-ve shkroi në postimin e tij se “Venezuela po liron një numër të madh të burgosurish politikë, si shenjë e ‘kërkimit të paqes’”.
Megjithatë, sipas Trump, anijet luftarake amerikane do të mbeten në rajon “për arsye sigurie”.
Ai përsëriti gjithashtu se “të paktën 100 miliardë dollarë do të investohen nga kompanitë e mëdha të naftës, me të cilat do të takohem sot në Shtëpinë e Bardhë”.
Vendimi i Trump vjen pas lirimit të dy figurave të rëndësishme të opozitës venezueliane. Sipas organizatës për mbrojtjen e të drejtave të njeriut Foro Penal, bëhet fjalë për 62-vjeçarin Enrique Márquez, i cili kishte mbështetur kandidatin e opozitës Edmundo González si fitues të zgjedhjeve presidenciale të vitit 2024, si dhe për Biagio Pilieri, lider partie opozitare dhe deputet, i njohur për kritikat e tij ndaj qeverisë.
Postimi i plotë i Donald Trump për Venezuelën
Venezuela po liron një numër të madh të burgosurish politikë si shenjë e ‘kërkimit të paqes’. Kjo është një lëvizje shumë e rëndësishme dhe e zgjuar.
Shtetet e Bashkuara dhe Venezuela po bashkëpunojnë mirë, veçanërisht në lidhje me rindërtimin, në një formë shumë më të madhe, më të mirë dhe më moderne, të infrastrukturës së naftës dhe gazit.
Për shkak të këtij bashkëpunimi, anulova valën e dytë të sulmeve që ishte planifikuar, e cila duket se nuk do të jetë e nevojshme. Megjithatë, të gjitha anijet do të mbeten në pozicionet e tyre për arsye sigurie.
Të paktën 100 miliardë dollarë do të investohen nga kompanitë e mëdha të naftës, me të cilat do të takohem sot në Shtëpinë e Bardhë. Faleminderit për vëmendjen tuaj ndaj kësaj çështjeje!
j.l./ dita
Anullimi ta beri kongresi o hajdut mashtrus