Presidenti amerikan Donald Trump tronditi mbarë botën ditën e djeshme në SHBA, ku shpalli tarifat e reja për vendet që eksportojnë në SHBA. Përveç, Evropës, Kanadasë, Meksikës dhe vendeve aziatike, tarifa të reja për produktet e eksportuara janë vendosur dhe për Shqipërinë. Përqindja e eksporteve të Shqipërisë në SHBA nuk është shumë e lartë dhe arrin deri në 2% ose rreth 7 mld lekë në vitin 2024.
Por çfarë eksportojmë ne në SHBA?
Produktet më të eksportuara në SHBA janë Bimët Aromatike dhe Mjekësore që përfshijnë erëzat e vajrat esenciale, të cilat përfaqësojnë 67. 5% të eksportit. Të tjera produkte që ne eksportojmë drejt SHBA-së janë mineralet dhe produkte të tjera me peshë më të vogël, përfshirë veshjet dhe produkte ushqimore.
Çfarë ndodhi dje?
Presidenti Donald Trump shpalli tarifat e reja të vendosura për të gjitha produktet që do të importohen në SHBA nga vendet e tjera. Një tarifë prej 25% është vendosur mbi të gjitha importet e automjeteve dhe pjesëve të tyre, duke goditur veçanërisht prodhuesit evropianë dhe aziatikë të makinave. Për Shqipërinë, tarifa e përgjithshme prej 10% do të aplikohet mbi të gjitha eksportet drejt SHBA-së, përfshirë produkte si tekstilet, veshjet dhe produktet bujqësore që eksportohen në sasi të kufizuara.
Ekspertë ndërkombëtarë dhe partnerë tregtarë të SHBA-së kanë paralajmëruar për pasoja të rënda në ekonominë globale dhe rritje të çmimeve për konsumatorët amerikanë. Zyrtarë nga Bashkimi Evropian dhe Kanadaja kanë sinjalizuar se do të shqyrtojnë masa hakmarrëse. Presidenti Trump, ndërkohë, u shpreh se të ardhurat nga këto tarifa do të përdoren për të ulur taksat për qytetarët amerikanë dhe për të shlyer borxhin kombëtar.
j.l./ dita
