Brenda vitit do të ketë të tjerë emra politikanësh dhe biznesmenë shqiptarë që do të shpallen “non grata”.
Kështu ka deklaruar mbrëmjen e sotme për mediat, ambasadori i Mbretërisë së Bashkuar në Tiranë, Alastair King-Smith.
“E kemi bërë të qartë në korrik kur shpallëm sanksionet se ne do të marrim masa ndaj personave që kanë lidhje me korrupsionin dhe me kriminalitetin.
Dhe ato ishin të parat e një sërë masash që ne do të marrim në vazhdim, për t’i dhënë fund pandëshkueshmërisë.
Sanksionet e korrikut u morën ndaj një sërë individësh në Shqipëri.
Jemi siguruar që të kemi një qëndrim të ekuilibruar ndaj gjithë personave në spektrin politik, të biznesit e kështu me radhë.
Do të sigurohemi që të kemi një qasje sa më të balancuar edhe në sanksionet e ardhshme që do të ndërmarrim gjatë vitit”, tha ambasadori britanik.
I pyetur në lidhje me akuzat që kreu i Partisë Demokratike, Sali Berisha ka drejtuar ndaj tij për lidhje me kryebashkiakun e Tiranës, Erion Veliaj dhe ish-kreun e opozitës, Lulzim Bashën, ambasadori britanik u përgjigj shkurtimisht:
“Unë jam këtu si përfaqësues i qeverisë britanike dhe garantoj që do të kryej detyrën time në kuadër të misionit për të cilin jam zgjedhur”, u shpreh Alastair King-Smith.
m.b./dita
