Gjykata e Tiranës ka shpallur të pafajshëm Fatjon Muratin për çështjen e arsenalit të armëve.
Ajo bën me dije po ashtu se për këtë bazë armësh është dënuar me 7 vite e 6 muaj burg Kristjan Gjini, ndërsa Françeska Kolgjegja ka marrë dënimin e 90 orëve punë në interes publik. Gjini mori përsipër autorësinë e depos te zona e liqenit dhe shfajësoi Muratajn. Ky i fundit njihet si miku i Endrit Dokles dhe i dyshuar për masakrën e Fushë-Krujës me 3 të vrarë më 17 korrik 2022, mes tyre edhe kushëriri i Ervis Martinajt. Murataj është ende në kërkim, teksa iu bë atentat në “Don Bosko” ndaj familjarëve të tij në lokalin që kishte në pronësi në fillim të këtij viti dhe ku u vra një grua e pafajshme. Murataj u kap fundvitin e kaluar në makinë të blinduar me Doklen dhe kunatin e këtij të fundit në “Bulevardin e ri” në “Astir”, por u lirua pas disa javësh në rrethana të çuditshme. Aktualisht rezulton i dënuar për armëmbajtje pa leje, pasi iu gjet pistoletë me vete.
Kujtojmë se arsenali i armëve u zbulua më 13 korrik të vitit të shkuar. 25-vjeçari Kristjan Gjini, asokohe u arrestua pasi lëvizte me pistoletë e pas kontrollit në dy banesat e tij u gjendën një sërë armësh. Në këto banesa të marra me qira prej të riut banonte dhe e dashura e tij Kolgjegja.
Policia gjeti në dy ambientet e marra me qira 4 pistoleta, 2 automatike, 4 silenciatorë, 7 maska, 2 radio si ato të Policisë, një thikë, sasi lënde të dyshuar narkotike kanabis sativa, fishekë të kalibrave të ndryshëm, dorashka, krehra, dokumente të dyshuara të falsifikuara, targa të huaja dhe 2 automjetet.
Nga ana tjetër, Murati edhe pse i shpallur i pafajshëm për këtë çështje ndodhet në arrati pasi ka thyer masën e arrestit në shtëpi.
