Agjencia hungareze kundër korrupsionit bëri të ditur të premten se kishte sekuestruar para të gatshme me vlerë 19.5 milionë dollarë (14.8 milionë paund), të groposura në pyje dhe të fshehura në vende të tjera, gjatë hetimeve ndaj një ish-ministri të kabinetit të ish-liderit nacionalist, Viktor Orbán.
Miklós Seszták, ministër i zhvillimit kombëtar i Hungarisë në vitet 2014–2018, akuzohet për marrje ryshfeti në një skemë që përfshinte kompaninë shtetërore të transportit, përmes blerjes së autobusëve të përdorur me çmime të fryra.
Kryeministri Péter Magyar shënoi një fitore të thellë zgjedhore në muajin prill, duke i dhënë fund pushtetit 16-vjeçar të Orbán-it, pasi kishte premtuar hetimin e korrupsionit të dyshuar dhe shpërdorimit të detyrës gjatë qeverisjes së rivalit të tij.
Seszták, dy ministra të tjerë të epokës Orbán dhe vetë vëllai i Orbanit janë vënë në pranga për çështje të ndryshme, ndërsa hetimet për korrupsion kanë marrë hov javët e fundit.
Zyra Kombëtare për Rikuperimin dhe Mbrojtjen e Pasurive (NVVH), një organ antikorrupsion me kompetenca të gjera i krijuar si pjesë e fushatës së Magyar-it për llogaridhënie, njoftoi se kishte kontrolluar disa vendndodhje të enjten dhe të premten, në kuadër të procedimeve penale ndaj Seszták-ut.
”Gjatë kontrolleve, hetuesit gjetën shuma të mëdha parash cash: të groposura në pyje, të fshehura në objekte bujqësore, magazina dhe prona banimi, si dhe të ruajtura në kasaforta të sigurisë së lartë në vende të izoluara,” thuhet në deklaratë.
”Shuma totale e parave të gatshme të gjetura gjatë kontrollit dyditor ishte 5,071,632,000 forinta, 2,658,350 euro dhe 1,257,100 dollarë amerikanë,” shtoi ajo, duke e çuar vlerën e përgjithshme në 19.5 milionë dollarë.
NVVH tha se stafi i saj i depozitoi paratë në llogarinë e Thesarit të Shtetit Hungarez.
“Pas marrjes në dorëzim, 12 punonjës të Thesarit shpenzuan 8 orë për numërimin e parave duke përdorur 5 makina numërimi,” shkroi në Facebook ministri i financave, András Kármán.
Magyar e përshëndeti sekuestrimin si një pikë të mundshme kthese. ”Kjo shënon zyrtarisht fundin e mafies Fidesz-KDNP!” tha ai, duke iu referuar ish-koalicionit qeverisës të Orbán-it.
Ish-lideri Orban nuk reagoi ndaj zhvillimit të fundit. Më herët, Orbán i kishte denoncuar hetimet ndaj rrethit të tij të ngushtë si “persekutim politik” që synon burgosjen e tij.
m.aleksi / DITA
