Një shqiptar është vënë në pranga nga policia e Malit të Zi pasi është kapur me drogë të llojit kokainë në mjetin e tij.
Policia sekuestroi një sasi prej 18 kg e dyshuar lëndë narkotike kokainë në pikën e kalimit kufitar të Debela Brijeg, mëngjesin e sotëm.
Në hyrje të Malit të Zi, mjeti me targa franceze, i drejtuar nga një shtetas i Shqipërisë, është veçuar për kontroll të detajuar pas procedurës së rregullt doganore të kontrollit të automjeteve dhe pasagjerëve.
“Një sasi e madhe droge është gjetur në një hapësirë të posaçme nën sediljen e shoferit dhe të pasagjerit, gjatë kontrollit të detajuar të veturës së pasagjerëve “BMW”, i cili është kryer nga doganierët dhe policia kufitare”, njofton dogana malazeze.
Shtetasi i Shqipërisë është arrestuar ndërsa kokaina i është dorëzuar efektivëve të Departamentit të Antidrogës në Drejtorinë e Policisë. Paketimet janë të së njëjtës madhësi, peshë dhe formë, të ngjitura me shirit.
j.l./ dita
