Një plagosje me thikë ka ndodhur mesditën e sotme, në zonën e quajtur “Kapelja”, në qytetin e Vlorës. Mësohet se sherri ka nisur për një telefon, ndërsa të përfshirët fillimisht janë konfliktuar me fjalë dhe më pas debati ka vijuar deri në përdorimin e mjeteve prerëse. Si pasojë është qëlluar me thikë një 47-vjeçar, i cili është dërguar menjëherë në spitalin e Vlorës. Gjendja e tij raportohet jashtë rrezikut për jetën. Policia po punon për zbardhjen e plotë të rrethanave të plagosjes. Autori njoftohet se është vënë në pranga nga policia dhe do pyetet për shkakun e krimit. “Rreth orës 12:55, në lagjen “28 Nëntori”, dyshohet se gjatë një konflikti për motive të dobëta, shtetasi A. T., 34 vjeç, ka goditur me mjet prerës (thikë), shtetasin E. M., 47 vjeç. Shërbimet e Policisë kanë kapur autorin e dyshuar të ngjarjes, shtetasin A. T., dhe e kanë shoqëruar atë në ambientet e Komisariatit të Policisë Vlorë. Shtetasi E. M. ndodhet në spital, në kujdesin e mjekëve”, thuhet në njoftimin zyrtar.
