Kundërofensiva e shumëpritur e ushtrisë ukrainase kundër trupave pushtuese ruse ka filluar, duke i dhënë jetë një faze të re konfliktit që synon rivendosjen e sovranitetit territorial të Ukrainës dhe të ruajë mbështetjen perëndimore në luftë.
Lajmin e bën të ditur “Washington Post”, që citon katër burime ushtarake ukrainase, sipas të cilave trupat e Kievit kanë intensifikuar sulmet në vijën e parë në jug-lindje të vendit.
Dy burime zyrtare ukrainase, një prej të cilave e afërt me presidentin Volodymyr Zelensky, kanë konfirmuar për “ABC News” se një fazë e kundërofensivës ukrainase është në zhvillim e sipër.
Edhe sipas kryetarit të lëvizjes “Ne jemi bashkë me Rusinë”, Vladimir Rogov, trupat ukrainase kanë tentuar një sulm në shkallë të gjerë në rajonin e Zaporizhias në tre ditët e fundit.
“Në opinionin tim, tentativa për një kundërofensivë masive po zhvillohet prej tre, në mos katër ditësh”, ka deklaruar Rogov, i cituar nga agjencia e lajmeve “Tass”.
Ndërkohë, Kremlini ka reaguar me tone kërcënuese ndaj çdo agresioni nga pala ukrainase. Zëdhënësi Dmitry Peskov ka deklaruar se sabotimi i një strukture për eksportin e amoniakut nga Rusia, e ndodhur në rajonin ukrainas të Kharkivit, do të ketë një impakt negativ ndaj akordit për eksportin e grurit ukrainas, që skadon më 17 korrik.
