Ura e fshatit Ketë në Klos është shembur vetëm 10 ditë pas inaugurimit nga bashkia.
Për rrjedhojë, banorët kanë mbetur sërish të izoluar, pasi kjo urë lidhte fshatin Ketë me Rrugën e Arbrit, duke pamundësuar kështu edhe dërgimin e fëmijëve në shkollë.
Ndërtimi i kësaj ure nisi në dhjetor të vitit 2025 dhe punimet u realizuan nga kompania “Bajrami N sh.p.k” me zotëruese Anduena Bajramin. Për mbikëqyrjen e punimeve Bashkia Klos kishte kontraktuar kompaninë “TRIANGLE” me zotërues, Zenulla Mehmetin.
Në total ndërtimi i urës së fshatit Ketë ka kushtuar rreth 40 milionë lekë. Shembja e saj ngre pikëpyetje të mëdha për procesin e kolaudimit dhe përdorimin e parave publike.
kryebashkiakja e Klosit, Valbona Kola e ka cilësuar ndërtimin e urës në fshatin Ketë një investim me vlerë për komunitetin, ku përmes një postimi në rrjetet e saj sociale ditën e përurimit, garantonte infrastrukturë më të sigurt dhe funksionale që do të përmirësonte jetën e banorëve.
Por ky postim u fshi menjëherë, pas shembjes së urës 3 ditë më parë, ndërsa fakti vijon të mbetet përtej algoritmeve të rrjeteve sociale.
VOX
