Përcaktohen rregullat se si do të ofrohen shërbimet mjekësorë në spitalet bashkiake, si dhe ato që do të funksionojnë si spitale ditore. Urdhri më i fundit i dikasterit të Shëndetësisë, i cili tashmë është zbardhur edhe në Fletoren Zyrtare të Qeverisë, detajon mënyrën e krijimit, organizimit dhe funksionimit të spitalit ditor dhe spitalit bashkiak publik, si dhe shërbimeve mjekësore që do të ofrohen për pacientët në to.
Spitali bashkiak është institucioni shëndetësor me shtretër që ofron kujdes shëndetësor për pacientët e të gjithë grupmoshave, të një ose më shumë bashkive, bazuar në shpërndarjen demografike dhe në planin spitalor rajonal, sipas sistemit të referimit.
Në spitalin bashkiak do të ofrohen shërbimet bazë të pranimit dhe menaxhimit të urgjencave mjekësore, pediatrisë, mjekësisë interne, laboratorit, radiologjia, farmacia, ndërkohë që do të mund të ofrohen edhe shërbime të tjera më të specializuara si: kirurgji, obstetrikë-gjinekologji, terapi intensive apo subintensive. Spitalet bashkiake do të mund të organizojnë edhe njësi të veçanta për kujdesin e zgjatur spitalor për rehabilitim apo kujdes paliativ për të sëmurët në fazën terminale të një sëmundjeje, njësi të sëmundjes së transfuzionit sipas përcaktimeve në planin rajonal spitalor mbi shërbimet e nevojshme në territor dhe në varësi të barrës të sëmundshmërisë.
Spitali bashkiak siguron vetë ose nëpërmjet një institucioni tjetër shëndetësor furnizimin me gjak dhe nënprodukte të prodhuara nga gjaku. Emërimi dhe shkarkimi i drejtorit të spitalit bëhet nga ministri përgjegjës për shëndetësinë, me propozim të Operatorit të Shërbimit të Kujdesit Shëndetësor, sipas legjislacionit në fuqi.
Ndërsa spitali ditor është spitali që ofron ndihmën e parë mjekësore për trajtim dhe kurim brenda 24 orëve dhe realizon diagnostikim, trajtim dhe/ose ndërhyrje kirurgjikale sipas shërbimeve të spitalit të përcaktuara në aktin e ngritjes së spitalit. Tipologjitë e përgjithshme të shërbimeve spitalore që ofron spitali ditor janë të përcaktuara në planin spitalor rajonal dhe shërbimet specifike të përcaktohen në aktin e miratimit të ngritjes së spitaleve.
Urdhri i dikasterit të shëndetësisë përcakton se financimi i spitaleve përfshirë dhe të ardhurat nga tarifat për shërbime klinike dhe joklinike për pacientë jashtë sistemit të referimit bëhet sipas legjislacionit në fuqi. Spitalet bashkiake dhe ditore, për financimin e shërbimeve shëndetësore dhe aktivitetit, lidhin kontratë me Fondin e Sigurimit të Detyrueshëm të Kujdesit Shëndetësor.
p.k\dita
