Presidentja e Komisionit Evropian Ursula von der Leyen i tha CNN të mërkurën se ajo beson se lëvizja e fundit nga presidenti rus Vladimir Putin kërkon një raund të ri të sanksioneve të Bashkimit Evropian kundër Rusisë.
“Presidenti Putin po tregon dobësinë e tij tani, sepse ajo që shihni është se ai përpiqet të mobilizojë personel që është më pak i trajnuar, me më pak përvojë, më pak i motivuar dhe ai dëshiron të fillojë referendume të rreme në tokën sovrane të Ukrainës. Kështu që unë mendoj se kjo kërkon përsëri sanksione nga ana jonë”, tha von der Leyen për Christiane Amanpour të CNN në një intervistë.
Më herët gjatë ditës, Putin njoftoi një mobilizim të menjëhershëm të pjesshëm të qytetarëve rusë, duke shënuar përshkallëzimin më të madh që nga fillimi i luftës së tij në Ukrainë.
Pas intervistës, von der Leyen dha këtë deklaratë për programin Amanpour, duke konfirmuar angazhimin e saj ndaj sanksioneve të reja kundër Moskës:
“Ne jemi të gatshëm të imponojmë kosto të mëtejshme ekonomike ndaj Rusisë dhe individëve dhe subjekteve brenda dhe jashtë Rusisë që mbështesin, politikisht ose ekonomikisht. Plus, ne do të propozojmë kontrolle shtesë të eksportit për teknologjinë civile ndërsa Rusia kalon në një ekonomi të plotë luftarake.”
Gjatë intervistës, udhëheqësja i BE-së përshëndeti efektin e sanksioneve të deritanishme, duke thënë se ato janë “me të vërtetë thumbuese”.
Kur Amanpour pyeti për retorikën bërthamore të liderit rus në fjalimin e tij të fundit, von der Leyen tha “Putini ka armë bërthamore, ky është një fakt, por kurrë nuk do të përkulet para shantazhit”.
a.m/dita
