“Ushqimi bërrnut, nuk ka ilaçe, dyshekë u japin vetëm miqve”, të dënuarit e paraburgimit denoncojnë kushtet e tyre

Të paraburgosurit e burgut të Elbasanit i kanë dërguar një letër të hapur disa institucioneve si Avokati i Popullit, ambasadës amerikane dhe disave të Bashkimit Europian, Komitetit të Helsinkit dhe Partisë Demokratike, duke denoncuar kushtet e vështira me të cilat sipas tyre po përballen.

Të paraburgosurit i kanë përmbledhur problematikat në 11 pika, që citohen më poshtë edhe në zhargon. “1. Ushqimi është bërrnut, racionet as për bebe nuk dalin. 2. Njerëzit flenë përtokë pa dyshekë se u japin vetëm miqve dyshekë, jastëkë, etj. Kurse hallexhinjtë mund të vdesin 3 . Nuk kemi kujdes mjekësor, kërkojmë për vizitë tek mjeku ose të na çojnë në spital mezi na çojnë, por në shumicën e rasteve nuk na çojnë, as nuk e çajnë kokën, në vend të qetësuesve na bëjnë ujë të distiluar. 4. Të paraburgosurve që punojnë nuk jua njohin ditët e punës, i mashtrojnë. 5. Liri veprimi nuk kemi fare, vetëm kati i tretë tek godina A ka liri dhe kati i dytë të godina B, ne jemi kati i dytë, godina A. Miqve të tyre drejtori dhe shefi i policisë ju ka lënë liri veprimi. 6. Zhurmat që na bëjnë kati i tretë janë të tmerrshme dhe ankohemi, por nuk merret asnjë masë. Burgun e kanë kthyer në privat. 7. Na hedhin ujë e plehra nga sipër. 8. Ilaçe nuk na japin. 9. Higjiena është ZERO. 10. Na keqtrajtojnë. 11. Na privojnë nga takimet me familjarët”, ishin pikë të cituara në letër.

Ndërkohë, ata hedhin edhe akuza nepotizmi ndaj drejtorit të atij institucioni, Arben Xhina dhe për shefin e regjimit të burgut Vladimir Skënderi, që ndër të tjerat akuzohet se në radhët e rojeve “ka të gjithë kushërinj dhe miq të tij”.

Të paraburgosurit e Elbasanit mbyllin letrën duke thënë se “vërtet jemi në burg, por kemi edhe ne të drejtat tona si qenie njerëzore”.