Ka ndërruar jetë në moshën 87-vjeçare Maricarmen Abascal, gruaja që u kthye në simbol të protestave për të drejtën e strehimit në Spanjë, pasi u dëbua nga banesa ku kishte jetuar për 70 vjet.
Abascal jetonte në një apartament në Madrid dhe për vite me radhë ishte përballur me një betejë ligjore për të mos humbur shtëpinë e saj. Pronarët kërkonin t’ia rrisnin qiranë nga 500 euro në më shumë se 2 mijë euro në muaj.
Më 23 shtator, pavarësisht gjendjes së saj të rënduar shëndetësore, dëbimi u krye. Pas largimit nga banesa, 87-vjeçarja u shtrua në spital, ku qëndroi deri në ditët e fundit të jetës.
Rasti i saj shkaktoi reagime të forta në të gjithë Spanjën. Fillimisht qindra dhe më pas mijëra njerëz u mblodhën me çadra në Puerta del Sol, një nga sheshet kryesore të Madridit, duke kërkuar masa më të forta për mbrojtjen e qiramarrësve dhe të drejtën për një banesë.
Presioni i protestave çoi edhe në miratimin e dy masave nga qeveria e kryeministrit Pedro Sánchez, që synonin të ndalonin dëbimet për personat më të pambrojtur dhe të zgjasnin me dy vjet kontratat e qirasë që ishin drejt përfundimit. Këto masa u njohën si “dekretet Maricarmen”, në nder të 87-vjeçares që u bë simbol i krizës së strehimit.
Sindikata e Qiramarrësve, e cila e kishte mbështetur Abascal gjatë betejës së saj ligjore, njoftoi vdekjen e saj përmes rrjeteve sociale.
“Na dhemb të njoftojmë se sot ka ndërruar jetë Maricarmen”, thuhej në mesazhin e sindikatës. Sipas saj, edhe pse më vonë u arrit një marrëveshje që do t’i mundësonte gruas të kthehej në shtëpinë e saj, zgjidhja erdhi shumë vonë.
Sindikata e cilësoi dëbimin e 87-vjeçares si një situatë që mund të ishte shmangur, pas një beteje të gjatë dhe të vështirë ligjore.
Ndërkohë, sindikatat kryesore të punëtorëve në Spanjë kanë thirrur një grevë të përgjithshme më 11 nëntor. Në qendër të protestës janë kërkesat për të drejtën e strehimit dhe për paga më të mira.
