Fatkeqësitë me turistët në vendin tonë nuk kanë të sosur. Këtë herë është një shtetas polak, i moshës 70 vjeç, që është gjetur pa shenja jete në një hotel në zonën e Golemit, në Durrës. Sipas informacioneve paraprake nga policia, bëhet me dije se vdekja e turistit dyshohet të ketë ardhur për shkaqe natyrale, por hetimet janë ende aktive dhe priten rezultatet e autopsisë nga mjeko-ligjorët.
“Më datë 04.06.2023, rreth orës 23:50, në Golem, në dhomën e një hoteli, ka ndrruar jetë shtetasi polak T. Z., 70 vjeç, i cili ishte i akomoduar pranë këtij hoteli. Nga veprimet e kryera dyshohet se vdekja ka ardhur për shkaqe natyrale (arrest kardiak)”, njofton policia.
Grupi hetimor dhe policia po vijojnë punën për zbardhjen e plotë të rrethanave të ngjarjes. Paraprakisht besohet se ka qenë atak kardiak. Vetëm këtë vit numërohen të paktën 13 turistë të huaj që kanë humbur jetën në vendin tonë, në alpinizëm, aksidente, kanione, zona bregdetare dhe hotele.
Kujtojmë dy turistet në malësinë e Valbonës, shtetasen gjermane në kanionet e Skraparit, austriaken në Përmet gjatë turit çiklistik dhe një tjetër gjermane në kanionin e Langaricës, si dhe atë që vdiq në aksident në Prrenjas një muaj më parë.
