Veliaj: “Ne ndërtojmë shkolla e çerdhe, opozita i shtyn njerëzit të ‘shqyen’ për politikë”

Kreu i Bashkisë së Tiranës, Erion Veliaj foli ditën e sotme edhe për 12 shkollat e reja, të cilat u hapën këtë vit shkollor.

Në një intervistë për Neës 24, Veliaj tha se nuk mund të politizohet gjithçka e mirë që bëhet në kryeqytet dhe njerëzit nuk mund të ‘shqyen’ për politikë.

“Pse duhet të protestojmë tre vjet për Astirin? Sot kemi një rrugë që ka zhbllokuar trafikun aty. Pse duhet të punojmë tre vjet, sherr e shamata, nëpër Prokurori e gjyqe, për rindërtimin e “Sami Frashërit”? Pse duhet të bëjmë të njëjtën gjë për rindërtimin në Kombinat? Pse duhet të bëjmë të njëjtën gjë për rindërtimin te “5 Maji”? Harxhojmë kohë shumë të çmuar! Kur dëgjoja dje eksponentë të opozitës, që thoshin ‘jo po shkollat me dy turne’, thashë ‘po si ka mundësi’. Në zonën e “Jeronim de Radës”, aty ku zonja e opozitës jepte intervistë, sapo kemi mbaruar edhe shkollën “Hasan Vogli”, edhe shkollën “Qazim Turdiu”. Shkollat e reja janë bërë tre herë më të mëdha, kurse në disa shkolla kemi një të tretën e kapacitetit, dhe në disa shkolla ekzistuese kemi dyfishin e kapacitetit, pra mjafton vetëm të ndahemi. Opozita duhet të thotë: me fëmijët nuk do bëjmë politikë, por do të ndihmojmë qeverinë dhe bashkinë që të ndahen të gjithë fëmijët në shkollat e reja. Në vend që të bëjnë këtë, i fryjnë histerisë që është pa kuptim, a thua se nuk jetojmë në një qytet, nuk marrim të njëjtin oksigjen, nuk ecim në të njëjtat rrugë. Ndaj, unë besoj që ka ardhur koha për një pajtim të madh kombëtar. Nuk duhet të vazhdojë kjo histori, kur vjen puna tek çerdhet, tek kopshtet, tek shkollat, tek hapësirat publike, tek autostradat, tek Unaza e Madhe që na lidh të gjithëve, ne nuk i pyesim fëmijët në shkollë je i majtë apo je i djathtë, apo si kanë votuar prindërit dhe gjyshërit”, shtoi Veliaj.

o.j/dita