Një 46-vjeçar në Elbasan është raportuar i zhdukur nga vëllai i tij, i cili ditën e djeshme, teksa kishte shkuar për të punuar një sipërfaqe toke buzë lumit të Shkumbinit, nuk është kthyer më. Vëllai i tij dyshon se 46-vjeçarin e ka marrë rrjedha e lumit Shkumbin, gjë që shpjegon se pse s’është kthyer në banesë. Ai dyshon se ngjarja ka ndodhur gjatë kohës që ka tentuar të kalojë në kahun tjetër të lumit, për t’u kthyer në banesë.
Menjëherë pas marrjes së njoftimit, shërbimet e Policisë së bashku me familjarët, kanë nisur kërkimet përgjatë shtratit të lumit Shkumbin.
Gjithashtu, krahas shërbimeve të Drejtorisë Vendore të Policisë Elbasan, janë angazhuar edhe palombarët e Repartit Special RENEA, të cilët vijojnë kërkimet në të gjithë rrjedhën e lumit, me qëllim gjetjen e trupit të 46-vjeçarit.
