Spitalet dhe qendrat shëndetësore vijojnë të kenë mungesa të shumta për profesionistë të shkencave mjekësore teknike. Portali i Punësimit “Infermier për Shqipërinë” së fundmi ka detajuar vendet e lira për për kandidatët që janë në pritje të punësimit në spitalet universitare, spitalet rajonale dhe bashkiake, si dhe qendrat shëndetësore, për profilet: infermieri, mami, teknik imazherie, teknik laboratori, fizioterapi, apo edhe logopedi për Rajonin e Tiranës, Vlorës, Elbasanit dhe të Shkodrës.
Pas raportimit të bërë, strukturat shëndetësore që mbulon rajoni i Vlorës dhe Elbasanit raportojnë më shumë hapësira të lira për punësimin e këtyre profesionistëve. Ndërkohë që vakancat më të shumta janë në profilet infermieri dhe mami. Konkretisht, pranë qendrave shëndetësore, poliklinikave dhe spitaleve që mbulon Rajoni i Vlorës dhe Elbasanit janë raportuar 203 vende të lira pune për profesionistë të shkencave mjekësore teknike. Ndërsa në strukturat mjekësore publike të të gjitha niveleve që përfshin Rajoni i Tiranës dhe Shkodrës janë konfirmuar 166 vende të lira në këto profile shëndetësore. Ndarjen e plotë të vendeve vakante për secilin rajon, dhe institucion shëndetësor e gjeni të detajuar në tabelat në vijim të shkrimit.
Operatori i Shërbimeve të Kujdesit Shëndetësor bën me dije se plotësimi i këtyre vendeve vakante do të bëhet me kandidatët që ndodhen listat e pritjes të shpallura nga portali online i punësimit. Pjesa dërrmuese e të punësuarve do të mund të marrin kontratën definitive të punës, ndërsa një pjesë tjetër do të jenë të punësuar provizor, sipas nevojave të shpallura nga qendrat shëndetësore, poliklinikat, apo edhe strukturat spitalore. Për vendet provizore, autoritetet e shëndetit sqarojnë se pas përfundimit të periudhës së punësimit si zëvendësues, teknik i shkencave mjekësore në profilet përkatëse kalon në listën e pritjes duke u renditur në përputhje me pikët totale që ka siguruar nga fazat e konkurrimit nëpërmjet portalit.
Punësimet e reja të profesionistëve të shkencave mjekësore teknike në spitale, poliklinika e qendra shëndetësore bëhen nëpërmjet konkurrimeve që zhvillohen në portalin online “Infermier për Shqipërinë”, ku të gjithë të pajisurit me lejen e ushtrimit të profesionit në këto profile mund të konkurrojnë në dy fazat e përcaktuara (aplikimi me dosje dhe faza e dytë që është testimi i informatizuar që zhvillohet në Qendrën e Shërbimeve të Arsimit). Çdo kandidat që bëhet pjesë e portalit vlerësohet me pikë për secilën fazë konkurrimi. Pas përfundimit të këtyre dy fazave të konkurrimit bëhet edhe renditja e finale e të gjithë kandidatëve, duke nisur nga ata që kanë nivelin më të lartë të pikëve, e deri tek kandidati me pikët më të ulëta. Referuar kësaj liste do të vijojë edhe plotësimi i vendeve të lira që raportohen vazhdimit nga strukturat mjekësore publike sipas profileve përkatëse.
Lista e plotë me vendet vakante në strukturat mjekësore publike të Rajonit të Elbasanit
Lista e plotë me vendet vakante në strukturat mjekësore publike të Rajonit të Shkodrës
Lista e plotë me vendet vakante në strukturat mjekësore publike të Rajonit të Tiranës
Lista e plotë me vendet vakante në strukturat mjekësore publike të Rajonit të Vlorës
p.k\dita
