Më 31 maj në Itali lindi fëmija i parë që në certifikatën e lindjes do të ketë të dy mbiemrat e prindërve. Ky është rasti i parë që zbatohet pas vendimit të Gjykatës Kushtetuese.
Fëmija është nga një çift i pamartuar dhe prindërit zgjodhën mbiemrin e babait të tij, 21-vjeçarit me origjinë shqiptare, i ndjekur nga mbiemri i nënës së tij, 19 vjeç, nga Kalabria me banim në qytet. Më pas fëmija do të regjistrohet si banor në komunën kalabreze të vendbanimit të nënës.
Ditët e fundit, në fakt, një qarkore e Ministrisë së Brendshme i bëri funksionale dispozitat e reja, pas publikimit në Fletoren Zyrtare të vendimit që shpalli jo kushtetues rregullin që nuk i lejonte prindërit, të cilët donin që t’i venin fëmijës vetëm mbiemrin e nënës dhe që në mungesë të konsensusit mes tyre, të vendosej vetëm mbiemri i babait dhe jo atë të të dy prindërve.
Sipas rregullave të reja, në pritje të një ligji që përcakton mirë rregullat, në certifikatat e lindjes mbiemri i fëmijës duhet të përpilohet me mbiemrat e prindërve, sipas renditjes që ata vendosin (në fillim babai, pastaj nëna ose anasjelltas). Nëse prindërit nuk kanë marrëveshje për caktimin e mbiemrave, kërkohet ndërhyrja e gjyqtarit. Prindërit, megjithatë, mund të bien dakord edhe për atribuimin e një mbiemri të vetëm, i cili mund të jetë ose atëror ose nga nëna.
Në qarkore Ministria e Brendshme saktëson se “marrëveshja mes prindërve është thelbësore për t’i atribuar fëmijës mbiemrin e vetëm njërit prej prindërve. Në mungesë të kësaj marrëveshjeje, duhet t’i atribuohen mbiemrat e të dy prindërve, sipas radhës që ata vendosin. Më tej, nëse nuk ka marrëveshje për rendin e caktimit të mbiemrave, Gjykata Kushtetuese – në të njëjtën fjali – saktësoi se është e nevojshme ndërhyrja e gjyqtarit, të cilën tashmë sistemi ligjor e parashikon për zgjidhjen e mosmarrëveshjes për zgjedhjet për fëmijët”.
o.j/dita
