Duke folur për investimet në fushën e mbrojtjes, ministri Pirro Vengu u ndal dhe tek tensionet diplomatike mes Amerikës dhe bashkimit europian. Duke mos dashur që të ndajë pozicionin e Shqipërisë, ministri i mbrojtjes tha se vendi ynë ka identitet tërësisht euroatlantik.
“Për Shqipërinë nuk bëhet fjalë për një zgjidhje mes të dyjave. Mënyra sesi ne e ndërtojmë politinë në fushën e mbrojtjes ka të bëjë me identitetin tonë tërësisht euroatlantik. Nuk jemi mes Uashingtonit dhe Brukselit, por jemi brenda Uashingtonit dhe brënda Brukselit”, tha ministri i Mbrojtjes Pirro Vëngu.
Ndër të tjera ministri u ndal tek investimet për Forcat e Armatosura. Vengu theksoi se kompania KAYO është totalisht shtetërore, ndërkohë që dha detaje për marrëveshjen që qeveria ka bërë me kompanitë izraelike për sistemet fluturuese.
“Kompania KAYO është një kompani 100% shtetërore e cila nuk bën partneritet me individë, por institucionale bazuar në ato shtylla të politikës së mbrojtjes. Përsa i përket kompanisë Elbit, ne kemi një marrëveshje ndërshtetërore me Izraelin e sankionuar, e nënshkruar e cila parashikon një sërë kontratash dhe një sërë komponentësh armatimi . Fillojmë me sistemet dron dhe antidron dhe parashikohen në të ardhmen, këto ende të pafinalizuara sistemet e artilerisë”, shtoi Vëngu.
Duke u ndalur te rajoni për bashkëpunimin në fushën e mbrojtes mes Shqipërisë, Kosovës dhe Kroacisë, Vengu tha se nuk janë të dëtyruar ti kërkojnë leje Serbisë.
“Kjo është një marrëveshje trepalëshe e cila nuk është ndërtuar kundër askujt. Madje kam qënë unë i pari që kam shprehur dhe ftesë që Serbia nëse gjykon që rajoni, stabiliteti, qëndrueshmëria dhe e ardhmja euroatlantike e vendeve të rajonit është e rëndësishme, atëherë pse jo dhe Serbia ti bashkangjitet kësaj iniciative. Jua merr mendja që nuk kam marrë përgjigje përsa i përket kësaj ftese. Nuk besoj se Kroacia, Shqipëria dhe Kosova kanë nevojë për të marrë leje përsa i përket kësaj pjese”, tha më tej ministri i Mbrojtjes.
Për buxhetin e 2026, Vengu tha se nuk është në fokus vetëm fusha e armatimeve, por edhe ajo e emergjencave civile ku priten investime të tjera për përballimin e situatave kritike që shpesh herë përballet vendi me përmbytje, apo gjatë sezonit të verës me zjarre.
j.l./ dita
