Një kapitull i ri po hapet për promovimin e produkteve shqiptare në Amerikën e Veriut. Më 23 korrik 2026, në Mississauga të Ontarios, do të zhvillohet ceremonia e inaugurimit të hyrjes së verërave shqiptare në rrjetin prestigjioz kanadez LCBO, një zhvillim që shënon një arritje të rëndësishme për industrinë shqiptare të verës dhe për diplomacinë ekonomike të Shqipërisë.
Ambasada e Republikës së Shqipërisë në Kanada ka ftuar komunitetin shqiptar, miqtë e Shqipërisë dhe të gjithë të interesuarit të bëhen pjesë e kësaj ngjarjeje të veçantë, e cila do të mbahet në LCBO, në adresën 3020 Elmcreek Road, Mississauga, Ontario, nga ora 13:00 deri në 18:00.
Ky moment historik vjen pas përpjekjeve të vazhdueshme për promovimin e produkteve shqiptare në tregun ndërkombëtar dhe është një rezultat i drejtpërdrejtë i pjesëmarrjes së Shqipërisë në panairin “World of Trade, Tourism and Taste 2025”, zhvilluar në Toronto më 30–31 maj 2025.
Falë këtij angazhimi, kantinat shqiptare “Pelium”, “Perla” dhe “Çobo” tashmë do të jenë pjesë e rrjetit LCBO, duke u dhënë konsumatorëve kanadezë mundësinë të njohin cilësinë, historinë dhe traditën e verërave shqiptare.
Ky sukses është rezultat i një bashkëpunimi të gjerë ndërmjet institucioneve dhe përfaqësuesve të biznesit, përfshirë Ambasadën e Republikës së Shqipërisë në Kanada, Drejtorinë e Diplomacisë Ekonomike në Ministrinë për Evropën dhe Punët e Jashtme të Republikës së Shqipërisë, Dhomën e Tregtisë dhe Biznesit të Diasporës Shqiptare, si dhe partnerë të tjerë që kontribuan në realizimin e kësaj nisme.
Një vlerësim i veçantë i kushtohet edhe kontributit të së ndjerës znj. Elisabeta Katiaj, ish-Kryetare e Dhomës së Biznesit të Diasporës, e cila u angazhua fuqishëm në promovimin e produkteve shqiptare dhe në forcimin e lidhjeve mes bizneseve shqiptare në diasporë dhe Shqipërisë.
Në këtë proces ka pasur gjithashtu një rol të rëndësishëm z. Arqile Karanxha, Drejtor i Operacioneve të Shitjeve të Produkteve në LCBO, si dhe vetë kantinat shqiptare që sollën në tregun kanadez produktet e tyre me histori dhe identitet kombëtar.
Hyrja e verërave shqiptare në LCBO nuk është vetëm një sukses tregtar, por edhe një mundësi për të prezantuar para publikut kanadez një pjesë të trashëgimisë shqiptare. Tradita mijëravjeçare e kultivimit të rrushit në trojet shqiptare, e kombinuar me teknologjinë moderne të prodhimit, po merr tashmë vëmendje në një nga tregjet më të rëndësishme të Amerikës së Veriut.
Pas ceremonisë në Mississauga, pritet të zhvillohet edhe një aktivitet i ngjashëm në Otavë, ku do të nderohet posaçërisht kujtimi dhe kontributi i znj. Elisabeta Katiaj për promovimin e produkteve shqiptare dhe mbështetjen e bashkëpunimit ekonomik mes Shqipërisë dhe diasporës.
Kjo ngjarje përbën një arsye krenarie për komunitetin shqiptar në Kanada dhe një dëshmi se puna, bashkëpunimi dhe vizioni i përbashkët mund të hapin dyer të reja për produktet shqiptare në tregjet botërore.
Vera shqiptare tashmë po shkruan një histori të re në Kanada.
m.a. / dita
