“The Simpsons” është një serial komedi i animuar amerikan i krijuar nga Matt Groening dhe mjaft popullor në të gjithë botën, sidomos për disa nga parashikimet e çuditshme. Në të rrëfehet jeta e një familjeje, në të cilën anëtarët janë; Homeri, Marge, Bart, Lisa dhe Maggie Simpson. Episodi i parë u transmetua më shumë se tridhjetë vjet më parë, konkretisht në 1989 dhe që atëherë nuk ka të ndalur.
Përgjatë 34 sezoneve që janë transmetuar, shumë shikues kanë pyetur veten pse personazhet kanë katër gishta. Në një intervistë për ‘TMZ’, Matt Groening zbuloi arsyen e vërtetë dhe komentoi se “ishte më e lehtë të vizatosh katër, sesa pesë!”. Megjithatë, shumë shikues të tjerë kanë vënë re se ka një personazh që ka pesë gishta: “Zotin”. Gjatë disa episodeve, shihet qartë se si ai ka një gisht më shumë se gjithë të tjerët. Springfielders-ët e tjerë kanë tre gishta dhe një gisht të madh në secilën dorë. Pavarësisht se krijuesi nuk ka dhënë asnjë arsye, hipoteza kryesore është se e kanë vënë ndryshe për t’i dhënë një epërsi ndaj të tjerëve dhe për të nxjerrë në pah perfeksionin. Dhe duket se ky argument është më bindës se ai që jep vetë regjisori Groening…
