Nga Migena Aleksi
Në këtë video, ish-ministri dhe deputeti Bledi Çuçi shfaqet me modelin më të fundit të një telefoni inteligjent me palosje, vlera e të cilit kap shifrën prej rreth 2,400 eurosh në treg.
Përtej të ardhurave zyrtare, bonuseve dhe përfitimeve të pafundme të kësaj klase, blerja e një pajisjeje të tillë mund të mos jetë një sfidë financiare për një politikan, veçanërisht politikan të një vendi të zhytur në shembuj flagrant korrupsioni. Por problemi nuk qëndron te llogaritë e tyre bankare edhe nëse këto janë të ligjshme, por te mesazhi.
Bledi Çuçi nuk është aspak rast i izoluar. Ai është pjesë e një mozaiku më të gjerë pushtetarësh, deputetësh, drejtorësh e zyrtarësh të lartë që, pavarësisht ngjyrave apo krahëve politikë, shfaqen kudo me aksesore të shtrenjta, orë luksoze që kushtojnë sa një apartament dhe makina përrallore. Për ta, kjo është kthyer në një standard të pashkruar të jetesës në karrigen e pushtetit.
Ky është portreti i një kulture politike që jeton e shkëputur plotësisht nga realiteti. Të shfaqesh kaq hapur me vegla luksi në një vend ku ata që të votojnë numërojnë çdo qindarkë për t’ia dalë mbanë muajit, tregon cinizëm të pafund dhe një pushtet që ka harruar hallet e atyre që thotë se përfaqëson.
Në demokracitë e shëndetshme, modestia dhe ndjeshmëria ndaj realitetit social janë detyrim minimal moral. Telefoni 2400 euro në dorën e një politikani dëshmon edhe njëherë më së miri pse gremina mes qytetarit dhe elitës politike në Shqipëri sa vjen e thellohet.
Çfarë mendoni? A është normale që përfaqësuesit e popullit të shfaqen me shembuj të tillë që sfidojnë kaq hapur realitetin e përditshëm të shqiptarëve?
DITA
