Disa video të regjistruara në orët e para të mëngjesit të sotëm në kryeqytet dokumentojnë momente të tensionuara mes forcave të Policisë së Shtetit, nxënësve të shkollave të mesme dhe përfaqësuesve të medias.
Në pamjet e siguruara shihen efektivë policie që ushtrojnë kontrolle të rrepta në çantat e gjimnazistëve. Gjendja stresi dhe përplasja verbale ka degraduar shpejt në dhunë fizike, ku punonjësit e rendit shihen duke shtyrë e goditur disa nga të rinjtë, përpara se t’i fusin me forcë në makinat e policisë për t’i shoqëruar në komisariat.
Ngjarja ka precipituar më tej kur një nga efektivët e policisë është konfrontuar drejtpërdrejt me një gazetar i cili po dokumentonte vizualisht ndërhyrjen e forcave të rendit.
Dhuna e tyre ndaj adoleshentëve ka nxitur edhe reagimin e ashpër të kalimtarëve të rastit që ndodheshin në vendngjarje. Teksa situata po tensionohej, në sfondin e videove dëgjohet qartë edhe thirrja e revoltuar e një qytetari drejtuar efektivëve: “Ai pi kokainë, ju rrihni kalamajtë!”
n.s. / dita
