Kandidati i koalicionit ‘Bashke Fitojmë’ në Himarë, Fredi Beleri është arrestuar mesnatën e sotme (e premte). Ai akuzohet për blerje votash. Arrestimi është urdhëruar nga SPAK.
Beleri ndodhej në brendësi të restorantit të tij në Himarë kur u shoqërua ne polici. Më pas ai u transferua në Vlorë.
DITA ka siguruar momentin e arrestimit. Siç duket edhe nga pamjet, Beleri po qëndron me disa persona në lokalin e tij në shëtitoren e Himarës kur efektivë të Policisë së Shtetit dhe agjentë të Byrosë Kombëtare të Hetimit, me urdhër të lëshuar nga SPAK i janë afruar dhe i kanë vendosur prangat atij dhe shoqëruesve.
Beleri, i njohur për deklaratat antishqiptare, u akuzua gjerësisht në opinionin publik ditët e fundit se ka në axhendë helenizimin e Himarës duke iu referuar një interviste që dha për gazetën greke Protothema.
Vetë Beleri hodhi poshtë akuzat duke u shprehur se e gjjtha ishte “fabrikim i mediave të Ramës” pasi ai vetë kishte folur vetëm për gjuhën greke dhe minoritetin.
j.l./ dita
