CIA amerikane ka pranuar se dështoi në vitet ’50 me planet për të përmbysur qeverinë komuniste në Shqipëri nëpërmjet bandave të desantëve.
Sipas disa studiuesve të periudhës së Luftës së Ftohtë, Sigurimi shqiptar kishte informacion të saktë për ardhjen e tyre nga shërbimet sovjetike, të cilat informoheshin nga Kim Filbi.
Ajo që njihet si Radioloja rezultoi në kapjen e disa prej armiqve realë më të betuar të komunistëve.
Një prej tyre ishte Hamit Matjani.
Ai së bashku me adjutantin e Zogut, Zenel Shehu (ky i fundit u bë bashkëpunëtor i Sigurimit) u kapën në fund të 1953 dhe u dënuan me vdekje në fillim të 1954.
Procesverbali i mëposhtëm botuar nga gazeta DITA është i mbledhjes së Byrosë Politike të kohës, ku diskutohet për ekzekutimin e tyre:
Mehmet Shehu: Ky gjyq ka rëndësi jo vetëm në shkallën nacionale, por edhe ndërkombëtare, pse me këtë goditet spiunazhi amerikan, grek dhe Italian gjer diku, demaskon në popull organizatat tradhtare të jashtme, varros Zogun dhe godit reaksionin e brendshëm.
Atje janë 6 diversantë. Mendimi im është që ata të dënohen me vdekje. Me këtë mënyrë ne godasim rëndë për herë të parë imperializmin amerikan, demaskojmë edhe grekët.
Prandaj mendoj të ekzekutohen që të 6 dhe nga të gjithë këtë Hamit Matjanin me litar në Lushnjë.
Byroja politike këtu duhet të ndërhyjë sepse Kadri Hazbiu nuk është dakord që këta njerëz të ekzekutohen, sidomos për Zenel Shehun.
Kadriu niset meqenëse Zenel Shehu u vu në shërbimin tonë. Tani Kadriu preket kur dëgjon që Zenel Shehu do të dënohet me vdekje.
Unë mendoj se Kadriu duhet sqaruar ndoshta nga shoku Komandant mendoj unë, se pikëpamjen time ai nuk e pranoi. Kadriu një njeri që nuk e njeh, mundet ta vrasë në vend, kurse një tjetër, qoftë edhe armik, e mbron, e trajton si shok.
Gjëra të tilla në Sigurim janë të palejueshme, madje të dëmshme.
Enver Hoxha: – Jam dakord me sa tha Mehmeti që të ekzekutohen, por jo ai me litar.
Beqir Balluku e Hysni Kapo: Ne jemi dakord që Hamit Matjani të varet në litar se kështu do të kënaqet populli, ta shohë nja 3-4 orë.
Enver Hoxha:– Unë e kisha nga kjo anë se krijohet një farë frike e padeklaruar në popull, kur sheh një njeri në atë gjendje me gjuhën jashtë, prandaj më mirë me pushkatim si të tjerët.
Mehmet Shehu: Po në lidhje me Kadriun për Zenrl Shehun?
Enver Hoxha: Zenel Shehu nëse u bë bashkëpunëtor, ka pasur frikë dhe jo se na do neve. Si t’ia hedhësh dorën në qafë atij qeni? Çështjen e Kadriut, ta shohim në Sekretariat ku duhet të vijë të na thotë ato që tha këtu, edhe Mehmet Shehu.
Shihni editorialin e përgatitur nga DITA.
