Ende pa nisur seanca plenare, tensionet në sallën e Kuvendit kanë nisur.
Të pranishëm në sallë janë deputetët e Partisë Demokratike të cilët kanë kthyer përmbys karriget.
Gjithashtu në Kuvend janë të pranishëm edhe punonjësit e Gardës.
Deputeti i Partisë Demokratike, Gazmend Bardhi është përplasur me gardistët në godinën e Kuvendit.
“S’ju vjen zor, e keni kthyer këtu shtet policor, ndaloni ju gratë e PD-së të hyjnë në sallën e Parlamentit, kush jeni ju”, dëgjohet Bardhi teksa bërtet.
Kujtojmë që opozita e drejtuar nga ish-kryeministri Sali Berisha, ka paralajmëruar një qëndresë të fortë nga deputetët që mbështesin atë në seancën e sotme.
Deputetët e PD në momentin që i janë afruar derës së Kuvendit për t’u futur në sallë, janë përballur me një numër të madh gardistësh, të cilët i kanë ndaluar për t’i ushtruar kontroll të imtësishëm.
Sot pritet të zhvillohet seanca maratonë për miratimin e buxhetit të vitit 2024, të cilin opozita ka paralajmëruar se do ta bllokojë.
