Një incident politik është regjistruar dy ditë para zgjedhjeve lokale të 14 majit në Maliq. Deputeti i PD-së, Edmond Spaho është konfliktuar me kryebashkiakun e Maliqit, Gëzim Topçiun dhe deputetin e PS-së, Ilir Pendavinji, të cilët ka shkuar t’i provokojë, duke i filmuar në një takim elektoral.
Konflikti është regjistruar në zonën e Vreshtasit, gjatë një takimi elektoral që po kryente Topçiu me traktoristët e zonës. Fermerët që ishin në këtë takim kanë filluar të brohorasin kundrejt deputetit demokrat për ta larguar këtë të fundit nga takimi, pasi Spaho ka tentuar të prishë takimin dhe e ka akuzuar si mashtrues. Ata e përzunë Spahon me brohorima, ndërsa deputeti i PD tha se i morën telefonin.
Nga video e publikuar nga vetë Spaho, në fakt duket një takim nornal fushate, ndryshe nga sa pretendon deputeti i “Foltores”. Ndërkohë që Topçiu reagoi pas publikimit të videos dhe lajmit, duke thënë se ishte interesuar për gjendjen e fermerëve dhe për të dëgjuar hallet e tyre, teksa ka bërë edhe një denoncim në Prokurori për deputetin Spaho për sulmin dhe filmimin.
