Emisioni Inside Story në kanalin TCH ka bërë një vëzhgim në tregun ushqimor të vendit me fokus produktet e bulmetit, ku aktualisht veprojnë 4 prodhues të mëdhenj, Lufra, Erzeni, Zeppa dhe Natyral.
Pasi ka eksperimentuar me djathin dhe qumështin, në emision u raportua mbi cilësinë që rezultoi nga vëzhgimi (shih videon poshtë tekstit).
Raporton emisioni:
“Me një vëzhgim të thjeshtë në treg mund të kuptosh shumë për cilësinë e djathit edhe nga çmimi. Sa herë që ju drejtuam dyqaneve për të blerë djathë, vetë shitësit nuk na i rekomandonin djathin me çmimin e ulët. Por edhe nga provat rezultoi se djathi me çmimin e ulët kishte në përbërjen e vetë, niseshte. Pra nuk kishte elementë ushqyes si “djath natyral”, për të cilën në fakt e blejnë konsumatorët.
Përveç djathit ne mund të provojmë në shtëpi edhe kosin dhe qumështin sa u përket parametrave ushqimorë. Një mënyrë është që me kosin e zënë nga qumështi i fshatarëve të provojmë të kthejmë në kos qumështin industrial që blejmë në markete. Qumështi që nuk do të zihet kos nuk ka elementët ushqyes natyralë.
Nga prova e bërë rezultoi se mostra e parë është si një masë ngjitëse, pra nuk ka formën e kosit. Qumështi i dytë është kthyer gjithashtu në një masë ngjitëse por jo në formën e kosit. Edhe mostra e tretë që kemi marrë përsëri është kthyer në një masë ngjitëse por jo në formën e kosit.
Qumështi i katërt është ai që u zu mirë kos.
Pra, nga 4 prodhues të mëdhenj që shpërndajnë produktet në të gjithë vendin, prova sugjeron se 3 prej tyre nuk kanë elementët ushqyes. Thënë më thjesht, ky është një mashtrim me bulmetin që konsumojmë” – raportoi Inside Story.
Po cili është prodhuesi i vetëm nga katër të tillë që nxjerr bulmet pa hile në treg?
Burime nga emisioni thanë se bëhet fjalë për produktet e firmës NATYRAL, kompani e cila operon prej 15 vitesh në këtë treg, e themeluar dhe drejtuar nga Artur Dojaka.
Tre të tjerat, Lufra, Erzeni dhe Zeppa nuk e kalojnë testin e cilësisë dhe vlerave ushqyese si ushqime natyrale. Me të drejtë emisioni i konsideron produktet e tyre, një mashtrim me bulmetin natyral, sepse secili prej tyre vendos në etiketë “natyral”, gjë që çorodit blerësin, por nuk qëndron nga pikëpamja e përbërjes dhe vlerave ushqyese.
Nga vëzhgimi në treg konstatohet se veçanërisht kompania Zeppa, e merr si ‘mbiemer’, pasi kudo shkruhet “Zeppa Natyral” duke shtuar konfuzionin tek qytetari.
“Natyral” në fakt është markë më vete, e regjistruar që në 2008 për tregun kombëtar dhe ndërkombetar. Është pikërisht marka e cila rezulton e vetmja në rregull, në eksperimentin e Inside Story.
i.b. / dita
