Ka pak shpresa të gjendet gjallë turisti holandez, Jules Schurmmans, i cili ra në rrjedhën e lumit Osum një ditë më parë. Ai po eksploronte kanionet me bashkëshorten Helma Schurmmans, e cila u gjet në breg nga ekipi i Federatës Shqiptare të Rafting, teksa kryenin një ekspeditë.
Drejtuesi i Federatës, Zamir Spathara, ka treguar për momentin e shpëtimit të 64-vjecares, Helma Schurmmans. Kërkimet kanë rifilluar të martën në mëngjes nga polombarët e RENEA-s, anëtarë të Federatës Rafting dhe forcat zjarrfikëse por ende pa rezultat.
“Ne kemi eksperiencë 20 vjeçare, e dimë rrezikun. Sot kanë kaluar 24 orë dhe nuk e gjejmë dot! Zhytësit po bëjnë krehje të zonës në të gjithë pikat, nga eksperienca trupi është zhytur poshtë në ujë dhe është e vështirë ta gjesh. Unë i shpreh ngushëllime familjes!”
Duhet të forcohet kuadri ligjor, thotë Spathara, sepse turistët e huaj nuk e njohin rrezikun e lumenjve e maleve tona.
“Ne bëmë një program një studim për lumenjtë e rrezikshëm dhe aktivitetet ujore dhe nivelin e vështirësisë së lumenjve, por ministria nuk e miratoi. Na duhet të jetë ligji i fortë.
Ne gjithmonë hasim në probleme, njerëz të pashoqëruar që s’kanë njohje për këtë lum dhe nuk e di me çfarë has! Përsëri do të ndodhin këto incidente. Edhe sot arritëm të shpëtojmë një austriak që kishte hyrë në lumë pa veshje dhe i pashoqëruar”, tha ai.
Në një bisedë me DITA, Spathara tha gjithashtu se persona të pakualifikuar fusin turistë në zonë, në thyerje të rregullave të sigurisë. Tabelat e vendosura nga profesionistë të Rafting, shkulen nga këta individë, si tregon rasti më poshtë në foto:
Jules Schurmmans, 68 vjeç, dhe bashkëshortja e tij, Helma Schurmmans, 64 vjeç, ishin futur një ditë më parë në kanionet e Osumit për t’u larë. Rrjedha e ujit mori 68-vjeçarin, ndërsa bashkëshortja e tij ka arritur të dalë nga lumi.
Ajo u dërgua në spital për të marrë ndihmë mjekësore, ndërsa sot ka lënë ambientet e spitalit dhe i është bashkuar kërkimeve për gjetjen e bashkëshortit të saj.
a.q. / dita
