VIDEO: “Shtrëngimi i duarve më i gjatë në botë”, shihni çfarë ndodh mes Erdogan dhe Musk në Katar

Presidenti turk, Recep Tayyip Erdogan dhe miliarderi Elon Musk janë takuar në ndeshjen finale të Kupës së Botës në Katar.

Disa media e kanë quajtur “shtrëngimi i duarve më i gjatë në botë”. Erdogan dhe Musk shihet që komunikojnë intensivisht me “gjuhën e trupit” dhe ndihmën e dy përkthyesve.

Disa ditë më parë Erdogan tha se mund të futet në negociata me pronarin e ri të Twitter-it për të shmangur pagesën e 8 dollarëve në muaj që Elon Musk ka deklaruar se do të vendosë për dhënien e etiketës blu që i njeh llogaritë në rrjetin social si të “verifikuara”.

Pasi bleu Twitter-in për 44 miliardë dollarë, Musk tha se kompania e tij do të vendosë një çmim prej 20 dollarësh në muaj për etiketën blu, por më pas e uli çmimin në 8 dollarë në muaj.

Në një intervistë për televizionin turk, ATV, Erdogan tha se mund të flasë personalisht me Musk për të diskutuar pagesën. “Mund të jetë ndryshe për ne”, tha Erdogan kur u pyet për këtë temë. “Mund të përdorim pak diplomaci me të”, shtoi ai duke qeshur.

Etiketa blu ngjitur me emrin e përdoruesit në platformën e medias sociale do të thotë që Twitter e ka konfirmuar se kujt i përket llogaria, qoftë person apo kompani. Aktualisht, Twitter është falas për pjesën më të madhe të përdoruesve.

Musk tha se llogaritë me etiketën blu do të kenë prioritet në aktivitetin e tyre në rrjetin social dhe do të kishin mundësi të postonin video dhe audio më të gjata.

i.b. / dita