Nga Migena Aleksi
Në një sistem demokratik që funksionon, pushteti buron nga vota e qytetarëve dhe mbahet përmes llogaridhënies e përulësisë ndaj sovranit. Kur ai shndërrohet në një përzierje fodullëku dhe përçmimi ndaj çdo zëri ndryshe, vijnë ditë jo të mira për të gjithë. Si këto që po jetojmë.
Videoja që po qarkullon së fundmi është pasqyrë e qartë e kësaj fryme. Aty dëgjohet Rama duke thënë “do iki kur të dua vetë”, një shpërfillje e hapur ndaj parimit themelor të demokracisë.
Është një deklaratë që pasqyron stilin e tij të njohur të të folurit. Retorikë boshe e sigurisë absolute dhe provokim. Fusha që kryeministër Edi e ka me merak. Mendon se aty shkëlqen.
Por kur një KM pretendon se fati i tij politik përcaktohet vetëm nga vullneti i tij personal, ai së pari e ka zhveshur ushtrimin e pushtetit nga fryma e llogaridhënies. Së dyti njo qasje plotësohet nga gjuha përçmuese dhe fyese me të cilën ka etiketuar protestuesit gjatë muajve të fundit.
Në vend të dëgjimit të shqetësimeve, të kërkesave kundër korrupsionit, për pronat dhe lejet në bregdet etj reagimi i tij është etiketimi, ironia e ulët, ndaj revoltës popullore.
Arroganca nuk është forcë. Ajo është shenja e parë e shkëputjes përfundimtare nga realiteti i qytetarëve të thjeshtë.
DITA
