Një targë CD e vjedhur disa ditë më parë në rrugën “Skënderbeg”, njohur si Rruga e Ambasadave në Tiranë, ka ngritur në këmbë Policinë. Një person, ende i paidentifikuar, mësohet se ka marrë targën diplomatike të ambasadës polake dhe është larguar. Policia, përmes pamjeve të kamerave të sigurisë në zonë, ka mundur të fiksojë autorin e dyshuar të vjedhjes, por deri tani ka qenë i vështirë identifikimi.
Ngjarja ka ndodhur disa ditë më parë. Në media u publikua edhe një foto nga kamerat e sigurisë të autorit të dyshuar të ngjarjes. Policia e Tiranës ka ngritur dyshime për qëllimet e vjedhjes së targës, teksa dyshon se përveç atij të spiunazhit, hetohet edhe për aktivitete të paligjshme trafiku apo kriminale. Me një targë CD kontrollet policore janë të pamundura fizikisht tek mjetet që qarkullojnë dhe ndoshta grupi kriminal këtë ka pasur si synim. Pa përjashtuar edhe përdorimin e tyre për ndonjë atentat të mundshëm.
