Vrasja e 7-vjeçares, Çuçi: Kam reaguar me vepra, akuzat ndaj meje i nxit Berisha

Ministri i Brendshëm, Bledi Çuçi ia ka vënë fajin kryedemokratit Sali Berisha për tragjedinë e ndodhur në Potam, ku u vra një vajzë 7-vjeçe nga polici Arjan Tase.

4 ditë pas ngjarjes, ministri reagoi për herë të parë duke u shprehur se reagimin e tij e ka bërë me vepra, duke shkarkuar gjithë zinxhirin komandues të Policisë Kufitare të Vlorës.

Ndërsa shtoi se heshtja e tij është rruga e duhur për të respektuar dhimbjen e familjes së vajzës dhe të afërmve të saj. Por për të gjithë akuzat, përfshirë edhe ato për kompani me mjete lundruese dhe revoltën e qytetarëve ndaj tij, Çuçi fajësoi kryedemokratin Berisha.

“Gjatë këtyre ditëve të rënda për çdo shqiptar, por veçanërisht për familjen e vajzës dhe për ne që jemi përgjegjës për sigurinë e jetës së tyre, jam përpjekur të flas me veprime konkrete kundër fajtorëve të asaj tragjedie, të cilët tani janë para drejtësisë, përfshirë gjithashtu dhe të gjithë zinxhirin komandues të Policisë Kufitare Vlorë. Mendoj se kjo është rruga e duhur për të respektuar dhimbjen e familjes së vajzës dhe të afërmve të saj. Rruga për t’u përballur me baltën e Sali Berishës është 30- vjeçare dhe nuk më sfidon. Thjesht e kemi detyrim ndaj shqiptarëve të ndajmë fatin e Shqipërisë nga fati dhe balta e tij,”-shkruan ministri.

Reagimi i plotë:

Ka një përpjekje për të prodhuar fakte që të ilustrojnë akuzat e gatshme të Sali Berishës ndaj meje pas tragjedisë së fundit në Himarë. Për respekt të opinionit publik, që me të drejtë është i ngarkuar nga tragjedia e vajzës 7-vjeçare dhe dhimbja e familjes së saj, dua të sqaroj se sajesat me emrin tim dhe një shoqatë velierash sportive që kam krijuar me miq pasionantë të tyre, nuk kanë lidhje me asnjë biznes dhe aq më tepër me skafe apo gomone. I hedh poshtë me neveri këto sajesa, pasi duan të keqpërdorin në mënyrë të neveritshme këtë ngjarje tragjike, për ta mbajtur gjallë për hallet e tyre politike. Gjatë këtyre ditëve të rënda për çdo shqiptar, por veçanërisht për familjen e vajzës dhe për ne që jemi përgjegjës për sigurinë e jetës së tyre, jam përpjekur të flas me veprime konkrete kundër fajtorëve të asaj tragjedie, të cilët tani janë para drejtësisë, përfshirë gjithashtu dhe të gjithë zinxhirin komandues të Policisë Kufitare Vlorë. Mendoj se kjo është rruga e duhur për të respektuar dhimbjen e familjes së vajzës dhe të afërmve të saj. Rruga për t’u përballur me baltën e Sali Berishës është 30- vjeçare dhe nuk më sfidon. Thjesht e kemi detyrim ndaj shqiptarëve të ndajmë fatin e Shqipërisë nga fati dhe balta e tij.

Ngjarja e rëndë ndodhi më 2 gusht në Plazhin e Potamit. E mitura, Jonada Avdia po lahej në det kur u përplas fillimisht nga pjesa ballore e gomones, e më pas trupi i saj është prerë nga helikat duke ndërruar jetë në vend. Për këtë ngjarje të rëndë është shkarkuar i gjithë zinxhiri drejtues i Policisë Kufitare të Vlorës, si edhe inspektorët përgjegjës, por protestuesit kërkojnë 3 dorëheqje të tjera.

Ndaj kryeministrit Edi Rama kërkohet dorëheqja e Bledi Çuçit, Mirela Kumbaros dhe Gledis Nanos. Ndërsa autori i ngjarjes, Arjan Tase po përballet me drejtësinë.

j.l./ dita