Ardian Nikulaj u vra më 19 prill brenda lokalit të tij në Shëngjin. Porositës dhe organizator sipas hetimeve të policisë është Edmond Haxhia i cili ka rënë në pranga, së bashku me tre britanikë Thomas Mithan, Steve Hunt dhe Harriet Bridgeman.
Të katër këta janë prangosur, pasi autoritetet britanike kanë pranuar si të ligjshme kërkesën e bërë nga Policia e Shtetit.
Për këtë ngjarje mbetet në kërkim Harry Simpson, si dhe portugezi i akuzuar si vrasësi, Ruben Saravia. Ky i fundit, ka dalë nga territori shqiptar përmes Doganës së Kapshticës, bashkë me britanikun Harry Simson, në drejtim të Greqisë.
Britanikët dyshohet se kanë qenë informatorë, ata kanë qëndruar pikërisht në resortin në pronësi të biznesmenit Ardian Nikulaj dhe sipas hetuesve, ata kanë vëzhguar për ditë me radhë lëvizjet e tij dhe të stafit, të cilat më pas ia raportonin portugezit Ruben Saraiva.
Arsyeja pse në këtë krim të rëndë u përfshinë shtetas britanikë dhe vrasësi portugez, është se në Shqipëri, askush nuk mori përsipër të vriste Nikulajn, megjithëse përpjekjet janë bërë.
Hetimet kanë nxjerrë në dukje që ka patur përpjekje për të kontaktuar vrasës lokalë, por këto janë refuzuar. Sipas gazetarit të kronikës së zezë, Artan Hoxha, fisi Lestakaj ka tentuar më parë të kryente vrasjen nëpërmjet një vrasësi në Fushë Krujë.
Për këtë është ofruar një shumë prej 300 mijë euro, sipas gazetarit.
Ende nuk dihet sa është shuma që ka marrë banda britanike dhe ekzekutori portugez për këtë vrasje.
m.b./dita
