Hetimet për vrasjen e 43-vjeçarit shqiptar, Fatmir Ara, në Itali po vijojnë.
Pas arrestimit të një 30-vjeçari më 6 shtator, mediat italiane shkruajnë se ditën e djeshme janë vënë në pranga edhe 2 persona të tjerë. Bëhet fjalë për një 30-vjeçar dhe një 44-vjeçar, të dy italianë dhe pa precedentë të mëparshëm penalë.
Njësoj si në arrestimin e 6 shtatorit, edhe këta dy persona janë marrë fillimisht në pyetje për disa orë të premten nga karabinierët. Më pas, ata kanë kaluar në dorën e prokurorisë dhe janë marrë në pyetje sërish. Siç shkruajnë mediat ndaj tyre ka akuza për bashkëpunim në vrasje me paramendim.
30-vjeçari i arrestuar më 6 Shtator, e pranoi krimin pas disa orësh marrje në pyetje. Fillimisht ai u pyet nga karabinierët për më shumë se 12 orë.
Më pas zyrtarët e prokurorisë që për 17 orë të tjera vijuan marrjen në pyetje, gjatë natës dhe ditës që pasoi deri në orët e vona të pasdites. I dyshuari e modifikoi versionin e tij disa herë edhe kur hetuesit i sollën fakte të pakundërshtueshme.
Në fund u thye dhe pranoi vrasjen, duke dhënë edhe të dhëna të sakta për gjetjen e telefonit të viktimës, i hedhur shumë larg nga vendi i ngjarjes, dorezat e përdorura për të kryer vrasjen dhe armën që e kishte me leje.
43-vjeçari shqiptar Fatmir Ara u gjet i pajetë në një zonë të pyllëzuar 2 ditë pasi u shpall i humbur nga familja. Ai ishte qëlluar 3 herë me armë zjarri në kokë ndërsa dyshohet se para vrasjes ai të jetë dhunuar sipas të dhënave të nxjerra nga raporti paraprak i autopsisë.
j.l./ dita
