Policia e Kavajës bëri njoftimin zyrtar për ngjarjen e rëndë, të ndodhur në një lokal në lagjen nr. 1, ku mbeti i vrarë nga një person ende i paidentifikuar, Arjan Gosa, 48 vjeç. Burime zyrtare thanë se paraprakisht dyshohet pista e hakmarrjes, referuar edhe vdekjes së dyfishtë të 29 marsit, ku mbeti i vrarë vëllai i viktimës së sotme dhe personi tjetër që u përlesh me të. Besohet se të afërmit e Sali Rexhës, për shkakun se Armando Gosa ua vrau pa shkak njeriun e tyre, kanë menduar gjakmarrjen, por nuk përjashtohen edhe pistat e tjera.
Njoftimi i Policisë:
“Më datë 21.05.2023, rreth orës 18.30, në lagjen Nr. 1, në Kavajë, në një lokal, një person ende i paidentifikuar ka vrarë me armë zjarri pistoletë shtetasin A. G. Shërbimet e Policisë pas marrjes së njoftimit kanë shkuar menjëherë në vendngjarje, kanë rrethuar zonën, kanë ngritur pika kontrolli dhe vijon krehja e zonës për të bërë të mundur kapjen e autorit. Grupi hetimor nën drejtimin e Prokurorisë ndodhet në vendngjarje dhe vijon veprimet hetimore për sekuestrimin e provave me qëllim identifikimin dhe kapjen e autorit. Paraprakisht nga të dhënat e grumbulluara dyshohet se ngjarja ka ndodhur për motive hakmarrje”.
