Ka qenë e dashura e organizatorit, Edmond Haxhia, vajza që bashkëpunoi me Policinë e Shtetit dhe bëri që i gjithë grupi që organizoi vrasjen e Ardian Nikulajt të zbardhej para Policisë së Shtetit.
Mësohet se e dashura e Haxhisë ka rrëfyer të gjitha takimet që Edmond Haxhia kishte me grupin e vrasësve dhe bashkëpunëtorët e tjerë.
Vrasja e Nikulajt u zbardh një ditë më parë.
Policia e Shtetit doli me një deklaratë zyrtare ku njoftoi se gjithçka ishte planifikuar nga vëllezërit Lestakaj, me të cilët Nikulaj ishte në hasmëri që prej vitit 1997. Dyshohet se Lestakajt kishin paguar një skuadër të huajsh për të ardhur për të kryer vrasjen.
Sipas të dhënave të Policisë, në rolin e ekzekutorit ishte portugezi Ruben Saraiva, ndërsa katër britanikë ishin vëzhgues.
Ata janë identifikuar si: Harry Simson, Thomas Mithan, Steven Hunt dhe Harriet Bridgeman.
I gjithë ekipi menaxhohej nga Edmond Haxhia, djali i dajës i vëllezërve Lestakaj. Por, deri më tani asnjë prej të përfshirëve nuk janë arrestuar. Të gjithë janë larguar nga Shqipëria dhe nuk dihet destinacioni i tyre.
Nga ana tjetër, vetë vëllezërit Lestakaj ndodhen në Britaninë e Madhe.
j.l./ dita
