Është pranuar kërkesa për ekstradimin drejt Shqipërisë të shtetasit Ruben Ribeiro Saraiva, i cili kishte rolin e ekzekutorit në vrasjen e biznesmenit Ardian Nikulaj në lokalin në pronësi të tij në Shëngjin.
Lajmin e ka bërë me dije ministri i Brendshëm Taulant Balla i cili shkruan se Policia e Shtetit do të realizojë së shpejti ekstradimin e tij në Shqipëri.
“Sundimi i ligjit vijon të godasë mbi këdo dhe pandërshkueshmëria do të marrë fund. Askush nuk do të mund t’i fshihet.
Falë mbështetjes së Interpol, marrëdhënia me të cilët ka hyrë në një fazë të re, si dhe bashkëpunimit me agjencitë ligjzbatuese të Marokut, jemi bërë me dije se është pranuar kërkesa jonë për ekstradimin drejt Shqipërisë të shtetasit Ruben Ribeiro Saraiva, person i kërkuar nga drejtësia shqiptare si i dyshuar për një krim të rëndë.
Policia e Shtetit do të realizojë së shpejti ekstradimin e tij në Shqipëri”, shkruan ministri Balla.
a.c./dita
