Drejtori i Policisë së Shtetit, Muhamet Rrumbullaku, teksa zhvilloi një konferencë për shtyp për vrasjen e biznesmenit Ardian Nikulaj në Shëngjin, u pyet edhe për ngjarjen e rëndë që ndodhi disa ditë më parë, kur u vra 19-vjeçari Stiven Toshkësi, pas një konflikti për motive të dobëta. Rrumbullaku u shpreh se hetimet janë drejt përfundimit dhe se shumë shpejt edhe 18-vjeçari i shpallur në kërkim, Arbër Murataj, do të vihet në pranga për të sqaruar rolin në këtë ngjarje. “Mund t’ju them se hetimet janë drejt përfundimit dhe gjithçka është sqaruar lidhur me mekanizmin. Edhe personi që i atribuoheni si personi i shpallur në kërkim, shumë shpejt edhe ai do të vihet para organeve të drejtësisë, për të dhënë shpjegimet e tij në lidhje me rolin sa i përket ngjarjes”, u shpreh Rrumbullaku.
Në lidhje me ngjarjen e rëndë janë vënë në pranga Aksel Hoxhaj dhe Ensi Maze, me masë “arrest me burg”. Hetimet tregojnë se ata s’kishin lidhje me viktimën, por shkuan për ‘hatrin’ e Muratajt, i cili kishte përplasje me Toshkësin, për shkak të një vajze.
